A Cidade da Cultura de Santiago acolleu esta mañá a presentación da sétima edición de Camiño das Letras. Esta carreira iniciará, novamente, o seu percorrido no Pico Sacro.
O acto desenvolveuse no Auditorio Xosé Neira Vilas e foi presidido polos secretarios xerais de Cultura, Anxo Lorenzo, e de Política Lingüística, Valentín García. A cita contou coa presenza do alcalde do Concello de Boqueixón, Manuel Fernández Munín; do concelleiro de Educación, Xuventude e Políticas Lingüísticas de Santiago, Rubén Prol; do presidente da Federación Galega de Atletismo, Isidoro Hornillos; do director-xerente da empresa Xurdir, Ignacio Seijo; do director técnico da proba, Iván Sanmartín; de Xulio Xil, representante da familia de Xela Arias -escritora homenaneada este ano no Día das Letras Galegas-; e de Roberto Vilar, padriño desta proposta deportivo-cultural.
Na súa intervención, o rexedor salientou a importancia de desenvolver este tipo de propostas que supoñen un novo pulo na visibilización deses tesouros agochados a carón da casa. «As administracións públicas teñen a obriga de promover coas suas actuacións aquelas iniciativas que redunden en beneficio da cultura, do deporte, da saúde colectiva da cidadanía. Dende o Concello de Boqueixón, agardamos poder seguir colaborando nesta carreira durante moitos máis anos», asegurou. No caso concreto do municipio boqueixanés, amosouse especialmente satisfeito porque o Camiño das Letras «dará a coñecer máis, se cabe, o Pico Sacro como referente da cultura galega e do Camiño de Santiago. Ao mesmo tempo, esta carreira ofrecerá a posibilidade de descubrir o itinerario da Vía da Prata ao seu paso polo noso municipio».
O Camiño das Letras terá lugar o propio Día das Letras Galegas, o luns 17 de maio. O percorrido dará comezo ás 10.00 horas dende o Pico Sacro para despois discorrer polo itinerario da Vía da Prata e finalizar na Cidade da Cultura. A cita deportiva cumprirá o protocolo COVID-19 da Federación Galega de Atletismo (FGA) e da Xunta de Galicia.
O percorrido total será de 15 quilómetros na categoría absoluta. O número de máximo de persoas inscritas é de 200, estando xa esgotadas ao completarse o cupo aos 4 días de abrirse a inscrición.
Tal e como explicou o director técnico, Iván Sanmartín, debido á adaptación aos protocolos de seguridade e prevención contra a expansión da COVID-19, «este ano, a carreira desenvolverase en formato contrarreloxio, en saídas de dúas en dúas persoas para que en ningún momento as persoas poidan estar preto. Ademais, levaranse a cabo todas as medidas de seguridade». A carreira contará con 5 categorías: dúas Sub-20 sénior e 3 de Sub-20 Máster.
A información completa sobre esta proba pódese atopar na web www.carreirasgalegas.com.