ARQUIVO MUNICIPAL

Os concellos están obrigados a conservar a súa documentación debidamente organizada e descrita, co fin de lograr unha xestión administrativa cada día máis transparente e eficaz, que posibilite o dereito dos cidadáns para acceder á información municipal.

Deben, así mesmo, velar pola protección, recuperación e difusión do patrimonio documental do municipio. O Servizo de Arquivo, é o órgano do concello especializado na xestión e tratamento da documentación.

Un arquivo municipal, polo tanto, é un servizo público de carácter administrativo especializado na xestión e tratamento da documentación, na súa custodia e na súa divulgación. Está constituído basicamente polo conxunto de documentos producidos e recibidos polo concello da cidade no exercicio das súas funcións, ao longo da súa historia, que foron conservados para a súa utilización na xestión administrativa, a información cidadá, a proxección cultural e a investigación científica.

Deste xeito, un arquivo municipal é útil e necesario á Administración Pública, porque contén os antecedentes documentais para o seu bo goberno e administración; ao cidadán, porque no arquivo poden atopar os títulos ou as testemuñas imprescindibles para a defensa e reivindicación dos seus dereitos e intereses; ao investigador histórico, porque o arquivo é unha fonte primaria de investigación científica, base primordial da investigación histórica.