O Concello de Boqueixón continúa a súa promoción do Entroido da Ulla. Neste Domingo de Piñata estreouse, en colaboración coa Asociación Cultural da Filloa de Lestedo, un atranque virtual dos Xenerais da Ulla de Lestedo, que se pode visionar na canle de YouTube do Concello de Boqueixón ou facendo clic aquí. Protagonizado por Uxía Canabal Peón e Xulián Vázquez Canabal, e coa axuda de Olaia Canabal como apuntadora, réndese unha homenaxe simbólica a unha das actividades máis agardadas dentro da programación da Festa da Filloa de Lestedo.

Esta edición virtual da celebración, incluíu tamén a difusión das máis de medio cento de imaxes participantes no concurso fotográfico ‘Filloarte’. O álbum completo pódese visionar na páxina de Facebook da Festa da Filloa (https://www.facebook.com/filloaoficial) ou premendo nesta ligazón.

Dende o Concello de Boqueixón e dende a Asociación Cultural da Filloa de Lestedo agradecen “a implicación da veciñanza no desenvolvemento destas actividades e no mantemento desta celebración. Sen o seu esforzo e traballo non sería posible acadar o éxito acumulado nestes 38 anos de andaina”.