O Concello de Boqueixón vén de licitar as obras do proxecto “Mellora de camiño en Burgo-Lamas e outro” por un importe de 32.168,2 euros e que inclúe actuacións de mellora dos accesos a catro aldeas e da superficie de dous camiños do municipio. O prazo para presentar ofertas estará aberto ata o vindeiro 22 de abril.

Os traballos inclúen a mellora dos accesos ás aldeas de Manlle (Lamas), Eirexe (Pousada) e Santaia e Casalvieito (Codeso).

Catro actuacións nas que está prevista a mellora da capa de rodaxe do acceso con tratamento asfáltico superficial e rego de selado, previa reparación de fochancas. Unha superficie total de 1.740 metros cadrados.

Así mesmo, inclúese no proxecto a mellora dun camiño en Burgo (Lamas) de 140 metros de lonxitude e 3,5 metros de ancho. Unha actuación en zahorra, previo acondicionamento do camiño e execución de saneos con pedraplén. Finalmente, no caso da mellora do camiño en Baiuca (Ledesma) está previsto mellorar unha capa de rodaxe dun camiño de 395 metros de longo e 5,5 metros de ancho con tratamento asfáltico superficial e rego de selado. Unha actuación que inclúe 150 metros cadrados de abanico.

Toda a información sobre o procedemento está dispoñible na Plataforma de Contratación.