O roteiro dos Pescadores de Boqueixón abre este próximo sábado 30 de maio o programa Goza do Ulla 2026, unha iniciativa promovida polos vinte municipios polos que transcorre o río Ulla. Un programa que inclúe un total de 19 rutas (xa que unha delas é compartida entre 2 concellos) e que comezarán en Boqueixón o 30 de maio e rematarán en Santiso o 24 de outubro. As persoas interesadas en participar na ruta do 30 de maio deberán anotarse en boqueixonturismo@gmail.com ou no 981 513 061 (María Cruz Ferreiro Sanín).

O roteiro dos Pescadores é unha ruta lineal de 6,2 km de dificultade media baixa e que se realizará entre as 10:00 e as 12:00 horas do sábado 30 de maio. O punto de encontro será a Igrexa de San Pedro de Donas, onde as persoas participantes deixarán os coches para coller un autobús que os levará ao punto de partida do roteiro: o campo do río de Ponte Ledesma. Trátase, ademais, dun núcleo poboacional cun conxunto etnográfico moi importante composto pola igrexa parroquial Divino Salvador de Ledesma, a Ponte Vella de Ledesma e as Insuas de Gres sobre o Ulla.

A expedición percorrerá o roteiro dos Pescadores, un tramo da Rede Natura 2000 e espazo natural protexido. Trátase dunha fermosa sende propias dos pescadores cunhas vistas de gran beleza ata a parroquia de Donas. O sendeiro está en perfectas condicións, toda vez que o Concello de Boqueixón vén de rematar as obras de posta en valor deste itinerario natural.

Podes consultar toda programación de roteiros do programa Goza do Ulla 2026 neste enlace. Unha iniciativa na que participan concellos da Coruña, Lugo e Pontevedra: Antas de Ulla, Monterroso, Palas de Rei, Santiso, Agolada, Arzúa, Vila de Cruces, Touro, Boqueixón, Silleda, A Estrada, Vedra, Teo, Padrón, Pontecesures, Dodro, Valga, Catoira, Rianxo e Vilagarcía de Arousa. Uns municipios que traballan nestes momentos por constituír unha asociación de concellos que permita impulsar este programa e amplialo non só ás rutas de sendeirismo, senón tamén ao cicloturismo, a pesca ou actividades acuáticas en xeral.