O Concello de Boqueixón abrirá do 1 de xuño ao 30 de setembro o período de canxeo de vales para os padriños e madriñas das xardineiras do municipio. O proxecto “Amadriña / Apadriña unha xardineira” conta na actualidade cun total de 91 amadriñamentos / apadriñamentos formalizados, de forma que eses veciños/as levan anos responsabilizándose da plantación e mantemento dunha ou mesmo varias xardineiras municipais.
Para conseguilo, dende 2017 o Concello de Boqueixón asinaba convenios de colaboración cos viveiros do municipio para entregar 1 vale, dun valor de 10 euros, para que o padriño/madriña puidera canxear por plantas no viveiro para adornar a xardineira. “Este ano decidimos incrementar a 20 euros o valor do vale para cada xardineira”, explica o alcalde de Boqueixón, Ovidio Rodeiro, quen apunta que “decidimos aumentar a dotación económica polo incremento no custo do produto e tamén como unha medida para apoiar aos padriños e madriñas da xardineiras que co seu labor alongan a vida das plantas e embelecen o noso municipio”.
Neste sentido, Rodeiro Tato sinala que a campaña ten un dobre obxectivo: “axudar ao empresariado do noso municipio pero tamén motivar a participación da veciñanza nunha iniciativa que os involucra no coidado do mobiliario público e que nos permite acadar beneficios para o medio ambiente, xa que se alonga a vida das plantas e permite recuperar a nosa contorna rural cunha achega persoal e artística que cada veciño ou veciña quere aportar ao noso espazo común”.
Desenvolvemento da campaña
As persoas participantes neste programa municipal recibirán nos vindeiros días os seus vales por correo postal para proceder ao seu canxeo por plantas antes do vindeiro 30 de setembro. As posibilidades que se ofertan son as seguintes:
- Opción A: 15 plantas en maceta de 10,4 centímetros de diámetro (petunia, begonia, tajete ou clavelina)
- Opción B: 8 plantas en maceta de 13 centímetros de diámetro (surfinia, verbena, xeranio ou guineana)
Os devanditos vales poderanse canxear en Viveiros Compostela SAT (A Corna- Pousada) ou Xardín Compostela SL (Lestedo). Posteriormente, estes viveiros facturarán ao Concello de Boqueixón ese gasto, presentando como xustificante a factura e os vales recollidos entre a veciñanza.