O Concello de Boqueixón vén de licitar dous proxectos de ampliación e mellora da rede municipal de saneamento nos que investirá preto de 70.000 euros e que beneficiarán a seis aldeas do municipio. Dúas actuacións coas que o Concello de Boqueixón continúa avanzando no cumprimento do seu obxectivo de levar o saneamento ao 100% dos 105 núcleos do municipio, “algo excepcional para un pequeno municipio rural que xa ten conseguido algo sen parangón no resto da provincia: que o 100% da veciñanza teña acceso a un abastecemento de auga de calidade”, apunta o alcalde, Ovidio Rodeiro.

O primeiro dos proxectos adxudicados suporá un investimento de 40.000 euros na ampliación da rede de saneamento en Deseiro de Abaixo e Quián (Sergude), A Granxola (Codeso) e Loureda (Loureda). Unha actuación que suporá a instalación de 485 metros de tubaxe, 15 pozos de rexistro e 5 arquetas de conexión. As obras serán executadas pola empresa Hermanos Couto Fandiño SL.

Vivendas illadas

O segundo proxecto forma parte dun plan municipal elaborado en 2024 para mellorar o sistema de saneamento en vivendas alonxadas de núcleos de poboación, utilizando foxas sépticas comúns con sistemas de infiltración no terreo para a depuración das augas residuais de pequenos grupos de vivendas. Deste xeito evítase a instalación de quilómetros e quilómetros de canalización.

Nesta ocasión, a actuación centrarase nas aldeas de Espiñeira (Lamas) e Frenza (Sucira). En ambos os dous casos contémplase a instalación dun sistema de saneamento composto por unha foxa séptica horizontal de poliéster reforzado de fibra de vidro con dúas cámaras (decantador-dixestor e zona de clarificación), unha arqueta de toma de mostras e un pozo de infiltración, con recheo de grava. Prevese dar servizo a sete vivendas de Espiñeira e outras sete vivendas de Frenza.

Este proxecto de instalación de sistemas de saneamento autónomo foi adxudicado á firma Hermanos Couto Fandiño SL por un importe de 29.725 euros.