O Concello de Boqueixón está a piques de concluír os proxectos acometidos a través do Premio Parabéns para a posta en valor do Pico Sacro e da súa contorna. O alcalde boqueixanés, Manuel Fernández Munín, acompañou hoxe ao conselleiro de Cultura e Turismo, Román Rodríguez; á directora da Axencia Galega de Turismo, Nava Castro, e máis a delegado territorial da Xunta na Coruña, Ovidio Rodeiro, nun percorrido pola mellorada contorna do cumio deste monte sagrado.
Este enclave contará en breve cun roteiro que o unirá co Centro de Interpretación do Pico Sacro. “Queremos que o Pico Sacro sexa un lugar de obrigada parada para as persoas que percorrer a Vía da Prata. A través deste roteiro, poderán acceder dun xeito seguro ao cumio deste monte sagrado”, asegurou o alcalde de Boqueixón, Manuel Fernández Munín, quen salientou a importancia de ter obtido o Premio Parabéns 2017 outorgado pola Axencia Galega de Turismo. “O investimento de 388.000 euros permitiunos acometer unas actuacións moi necesarias para poñer en valor un enclave histórico, natural e cultural tan importante como o Pico Sacro”, afirmou.
Pola súa banda, Román Rodríguez destacou que “a Xunta logrou sumar neste proxecto varias das súas políticas máis significativas, como son a eliminación do feísmo arquitectónico, a protección da paisaxe, a promoción das rutas xacobeas e o coidado do patrimonio histórico e natural, todo co fin de facer a Galicia un destino turístico diferenciado e de primeiro nivel”.
Tras comprobaren as melloras acometidas no cumio do monte, as autoridades trasladáronse ao Centro de Interpretación do Pico Sacro, sito no lugar de Cachosenande. Este inmoble sufriu unha completa restauración. Así, procedeuse á a substitución da carpinteiría das fiestras, a recuperación do chan da planta baixa do edificio, ademais de labores de drenaxe e climatización para garantir a durabilidade desta infraestrutura. A actuación completouse co arranxo da maqueta do municipio de Boqueixón que xa se pode visitar no interior deste Centro de Interpretación.
Integración na paisaxe
Entre as actuacións acometidas a través do Premio Parabéns, atópanse as distintas medidas de redución do impacto paisaxístico do depósito municipal de augas situado na contorna do Pico Sacro. Para isto, acometeuse a substitución da cuberta desta infraestrutura para incorporar outra de tipo vexetal, á que se sumaron os traballos de limpeza correspondentes para non danar a estrutura das galerías. Tamén para eliminar o impacto paisaxístico, a primeira actuación acometida dentro deste proxecto foi a demolición dunha estrutura de formigón inacabada na subida ao cumio do Pico, que databa dos anos setenta.
Estas melloras complementáronse coa limpeza do terreo que rodea a Capela de San Sebastián, ademais da plantación de especies arbóreas e arbustivas autóctonas na contorna. Tamén se realizaron traballos de limpeza nas covas do cumio do Pico Sacro, baixo a supervisión de especialistas para non danar a estrutura das galerías.
