O Concello de Boqueixón toma coñecemento das 44 comunicacións de realización de cacharelas de San Xoán solicitadas pola veciñanza na noite do 23 ao 24 de xuño, depois de que a pasada medianoite se pechara o prazo de solicitude. Podes consultar as cacharelas autorizadas neste enlace.
E por unha segura e feliz noite de San Xoán para todos e todas, lembramos tamén as normas de obrigatorio cumprimento para maior seguridade á hora de montar as cacharelas:
- A fogueira gardará as distancias mínimas que establece a lexislación de prevención de incendios forestais a vivendas, vehículos, instalacións, tendidos eléctricos ou telefónicos e zonas vexetais susceptibles de ser queimadas.
- A súa dimensión non superará os 5 metros de altura e os 3 metros de diámetro.
- Non se queimarán residuos perigosos ou tóxicos tipo pneumáticos, aceites, plásticos, envases de aerosois, etcétera.
- En ningún caso se botarán ao lume recipientes que conteñan líquidos inflamables ou gases a presión (sprais), aínda que estean baleiros.
- Disporase no lugar dun sistema de extinción de incendios axeitado á proporción da fogueira.
- A fogueira permanecerá vixiada ata a súa total extinción que deberá se asegurada empapando os restos totalmente con auga.
- No caso de que se levante vento que poda dificultar a vixilancia e extinción da fogueira esta deberá suspenderse ou apagarse de inmediato.
- Será obrigatoria a limpeza dos espazos públicos autorizados ao remate da actividade, incluídos os elementos utilizados para o desenvolvemento do mesmo, inmediatamente despois de rematar a cacharela e/ou sardiñada
E lembra: en caso de emerxencia chama ao 112 ou ao 085.
