O Concello de Boqueixón autorizará a ocupación dun local na Casa da Cultura de Camporrapado para acoller unha nova Casa do Maior, toda vez que a Consellería de Política Social e Igualdade vén de publicar no Diario Oficial de Galicia (DOG) do luns 23 de xuño unha nova orde de axudas para a posta en marcha de casas do maior para os anos 2025 e 2026. O prazo para solicitalas remata o 24 de xullo.
O alcalde de Boqueixón, Ovidio Rodeiro, considera que a apertura dunha nova Casa do Maior en Camporrapado sería “unha vía axeitada para dar un servizo necesario, demandado pola veciñanza, sen custe e que permitirá incrementar a oferta xa dispoñible no municipio, que conta con outras dúas casas do maior en Vigo e Loureda. Sabemos que hai máis persoas interesadas en poñer en marcha algunha casa do maior noutras parroquias e dende o Concello queremos colaborar nunha iniciativa que fomenta a autonomía persoal dos nosos maiores”.
O local na Casa da Cultura de Camporrapado poderá ser ocupado temporalmente pola persoa que resulte adxudicataria da subvención para a posta en marcha dunha nova casa do maior en Boqueixón como consecuencia da Resolución que dite a Consellería de Política Social sobre a convocatoria realizada o pasado luns 23 de xuño. Unha persoa que deberá estar empadroada no Concello de Boqueixón.
A Xunta destinará algo máis de 1 millón de euros a esta convocatoria para os anos 2025 e 2026. O prazo de presentación de solicitudes estará aberto ata o 24 de xullo e o período mínimo de permanencia da actividade empresarial subvencionada será de 5 anos. As bases reguladoras da convocatoria poden consultarse na Orde do 6 de xuño de 2025 da Consellería de Política Social e Igualdade, publicada no DOG 118 de 23 de xuño de 2025.
Boqueixón conta na actualidade con dúas instalacións deste tipo: a Casa do Maior Lodeiro, posta en marcha na parroquia de Loureda pola emprendedora Marta Renda Guillán a principios de 2021; e a Casa do Maior de Carabán, promovida por Beatriz Mella Pazos a principios de 2024. Cada una delas dispón de 5 prazas: ben cinco persoas a tempo completo de 8 horas ou incluír xente a tempo parcial de 4 horas).
Poden acceder a estes servizos persoas de máis de 60 anos, tendo preferencia aquelas que teñan recoñecidos graos I ou II de Dependencia. O prezo é totalmente de balde, tanto do servizo como do desprazamento, financiado pola Consellería de Política Social. O xantar ten un prezo de 5 euros. O seu horario de atención é diúrno, durante 8 horas de luns a venres. Os Servizos Sociais de Boqueixón son os encargados de tramitar as solicitudes de praza na nova casa do maior (981 513 106).