O Centro de Formación e Esperimentación Agraria (CFEA) de Sergude (Boqueixón) acollerá mañá mércores 10 de xuño, a partir das 10:00 horas o foro «A España despoboada». Organizado pola Cadena SER en Galicia, ete foro abordará os principais desafíos aos que se enfronta o medio rural galego. A entrada é totalmente gratuíta, libre e sen necesidade de reserva previa.

A xornada arrincará ás 10:00 horas coa benvida do alcalde de Boqueixón, Ovidio Rodeiro, tras o que terá lugar a primeira mesa de debate: «O rural ante o relevo xeracional», coa participación de Juan Carlos Ferreras, director do CFEA de Sergude; Elena Torrado, alumna do 2º ciclo de Gandaría, e Adrián Taboada, alumno de 1º de Produción Agropecuaria, canda Álvaro Lado, ex alumno que traballa nunha granxa familiar en Mazaricos.

Despois, Stefanía Barca, investigadora do grupo CISPAC da USC, analizará se estamos preparados para o cambio climático e afondará nun informe sobre a transición ecolóxica e como inflúe a despoboación na loita contra o lume. Tras a entrevista, incorporarase á segunda mesa de debate: «Os retos do rural galego: do despoboamento á loita contra o lume», xunto a Roberto García, secretario xeral de Unións Agrarias; Juan Picos, profesor da Escola de Enxeñería Forestal da Universidade de Vigo; e Xosé Bieito, axente coordinador da UDEX.

Tras unha intervención da Cámara Oficial Mineira de Galicia sobre o rol da mineiría á hora de fixar poboación no rural, terá lugar unha derradeira mesa de debate: «O rural ten futuro», cos alcaldes de Boqueixón, Ovidio Rodeiro; Val do Dubra, Diego Díaz; e a concelleira de Turismo de Arzúa, Begoña Balado. A conselleira de Medio Rural, María José Gómez, pechará a xornada.