A conselleira de Economía e Industria, María Jesús Lorenzana, mantivo en San Caetano, unha reunión de traballo co alcalde de Boqueixón, Ovidio Rodeiro, para analizar as necesidades de solo empresarial no municipio coruñés, toda vez que este Concello foi beneficiario desde o ano 2016 de máis de 600.000 euros en axudas da Xunta para parques empresariais.
De feito, o Concello de Boqueixón vén de conseguir unha axuda de 120.000 euros da Consellería de Economía e Industria para a mellora da rede viaria de acceso ao polígono empresarial de Camporrapado. Unha actuación que inclúe o fresado previo do firme sobre unha superficie de 2.185 metros cadrados, tras o que se procederá a reparar os baches con grava e tratamento asfáltico semiprofundo. A actuación completarase cun aglomerado en quente da estrada.
A maiores, o Concello ancheará o viario nunha superficie de 160 metros cadrados. Así mesmo, para a correcta recollida das augas pluviais, executarase unha rígola de formigón de 20 centímetros e colocaranse 415 metros de tubaxe cos correspondentes pozos de rexistro e arquetas con sumidoiro. Sobre esta canalización construirase unha cuneta de seguridade para o tránsito de peóns. As obras inclúen o pintado da sinalización horizontal e a instalación de dous sinais de stop.
A titular de Economía e Industria subliñou que Galicia contará en 2030 con case 12 millóns de metros cadrados de novo solo industrial cun investimento de máis de 440 millóns de euros. Deles, preto de 4,2 millóns de m2 estarán na provincia da Coruña cun orzamento de 112 millóns de euros. O obxectivo é dispoñer dunha oferta de solo máis competitiva, equilibrada e adaptada ás necesidades do tecido produtivo, así como favorecer a captación de novos investimentos.
