Ponte Ledesma (Boqueixón) volverá ser un ano máis o escenario de dúas iniciativas culturais e patrimoniais durante o vindeiro mes de agosto: a Noite Velada e a visita guiada teatralizada “A Ponte da Honra”.  Dúas propostas pensadas para poñer en valor a riqueza histórica e natural desta contorna á beira do río Ulla.

Noite Velada: música e patrimonio á luz das candeas

A primeira das citas terá lugar o sábado 8 de agosto, a partir das 22:00 horas, coa celebración dunha nova edición da Noite Velada. Esta iniciativa, organizada polo Concello de Boqueixón coa colaboración da Deputación da Coruña, busca aunar tradición, cultura e patrimonio nunha atmosfera única, iluminando a ponte histórica e a súa contorna coa luz de tebras e candeas.

A animación musical da velada correrá a cargo das agrupacións Raeira, Muxicas da Silveira e Son de Gaita. Ademais, para comodidade das persoas asistentes, a área contará con postos de bebida durante toda a noite.

Visita guiada teatralizada: “A Ponte da Honra”

O programa cultural completaráse o domingo 9 de agosto, ás 20:00 horas, no mesmo marco do campo do río da Ponte, onde se levará a cabo a visita guiada teatralizada “A Ponte da Honra”, un percorrido polos episodios e historias máis senlleiras que rodean a Ponte Ledesma.

Esta actividade estará dirixida polo recoñecido guía e actor Suso Martínez, e contará coa participación especial de Daniel Lindh, a propia veciñanza do concello e o acompañamento musical de Muxicas da Silveira.

Para asistir á visita guiada teatralizada é imprescindible realizar inscrición previa enviando un correo electrónico ao departamento de Cultura: cultura@boqueixon.es

Coa organización destes eventos, o Concello de Boqueixón reafirma o seu compromiso coa divulgación do patrimonio histórico e o impulso de actividades de lecer de calidade para toda a veciñanza e visitantes durante a época estival.