O conselleiro de Presidencia, Xustiza e Deportes, Diego Calvo, acompañado dos alcaldes de Boqueixón, Ovidio Rodeiro, e do Pino, Manuel Taboada; e pola directora xeral de Administración Local, Natalia Prieto, comprobaron esta mañá as melloras realizadas no viario que vai de Loureda (Boqueixón) ao aeroporto de Santiago de Compostela. Unhas obras de pavimentación e limpeza de cunetas que supuxeron un investimento de 62.500 euros, dos que o Goberno galego achegou preto de 44.000 euros a través da Orde de infraestruturas de uso público.
Ovidio Rodeiro destacou que “se trata dun proxecto conxunto co Concello do Pino para aglomerar, reforzar o firme e mellorar os entronques cos camiños forestais da estrada que conecta Boqueixón co Pino, á altura do aeroporto. Unhas actuacións que buscan mellorar a seguridade viaria, facilitar o acceso ás zonas rurais e reforzar a conectividade entre ambos municipios grazas ao apoio da Xunta de Galicia”.
Obras
As obras tiveron lugar nun viario de 1.930 metros, 1.550 metros en Boqueixón e 380 metros no termo municipal do Pino. En ambos os dous tramos procedeuse á limpeza de gabias en ambas marxes do viario, cuxa capa de rodaxe foi mellorada grazas a 5 centímetros de aglomerado en quente. No caso concreto de Boqueixón, procedeuse tamén a un fresado previo sobre un ancho de 1,5 metros dende a beiravía, para mellorar a seguridade viaria.
A maiores, en Boqueixón realizouse unha actuación especial nos entronques cos camiños forestais, que foron acondicionados con 10 centímetros de grava e tratamento asfáltico semiprofundo para rematar cun aglomerado en quente de 4 centímetros, o pintado da liña de borde da estrada e a colocación da correspondente sinalización horizontal e vertical nestes entronques.
No tramo correspondente ao Pino, realizouse un bacheo previo do viario con 10% de grava e tratamento asfáltico semiprofundo, previo ao aglomerado en quente en toda a estrada. Así mesmo, procedeuse a pintura do borde da vía e do eixo da estrada.
Accesibilidade ao rural
Segundo sinalou o conselleiro, o obxectivo é facilitarlles aos concellos o acondicionamento das vías públicas, coa correcta drenaxe das augas pluviais e garantir así a accesibilidade nas mellores condicións aos núcleos rurais da contorna. Nesta liña, Diego Calvo salientou que precisamente a Orde de infraestruturas de uso público, dotada con 3,5 millóns de euros, está destinada a localidades de menos de 30.000 habitantes “co obxectivo de garantir o equilibrio territorial e que a poboación galega teñan unhas óptimas condicións de vida con independencia do seu lugar de residencia”, apuntou.
As achegas concedidas a través desta orde poden cubrir ata o 80% do gasto de creación e/ou mellora das infraestruturas, dotacións, instalacións e equipamentos vinculados á prestación de servizos municipais. O pasado ano esta medida permitiu impulsar 103 proxectos municipais en toda Galicia, 34 deles na provincia da Coruña.
Diego Calvo incidiu tamén no carácter prioritario que teñen os proxectos presentados de maneira conxunta por varios concellos, como foi o caso da proposta de Boqueixón e O Pino, xa que o feito de incentivar as diferentes fórmulas de xestión compartida na prestación dos servizos públicos permite promover unha xestión eficaz e eficiente, así como rendabilizar os recursos das administracións.
Apoio específico aos concellos
Ademais, lembrou que, a maiores da orde de infraestruturas de uso público, o Goberno galego abre cada ano diversas liñas específicas para os concellos, como o Fondo de Compensación Ambiental, que este exercicio aumenta o orzamento a 11,4 millóns de euros, ou a liña de apoio a proxectos estratéxicos do fondo adicional do Fondo de Cooperación Local, cunha dotación que tamén medra en 2026 e ascende a 10 millóns de euros. A elas súmase o Fondo de Cooperación Local, que segue subindo e chega a 187 millóns de euros, un 12% por riba de 2025.