A Cidade da Cultura de Santiago acolleu esta mañá o acto de presentación do programa do Entroido dos Xenerais da Ulla, festa declarada de Interese Turístico de Galicia e que terá lugar do 20 de xaneiro ao 18 de febreiro. Os oito concellos da comarca natural da Ulla participaron na presentación do programa de actividades, que inclúen múltiples atranques organizados polas agrupacións veciñais dos case 30 lugares e parroquias nos que anualmente ten lugar esta tradición.
No caso de Boqueixón, a festa terá lugar no campo da festa de Sergude o Domingo de Entroido, 11 de febreiro, a partir das oito da tarde. Unha semana despois, Domingo de Piñata e no marco da XLI Festa da Filloa de Lestedo, haberá a sétima edición do Desfile Intermunicipal dos Xenerais da Ulla (12:00 horas) e un Atranque dos Xenerais da Ulla (13:45 horas). Máis información: www.xeneraisdaulla.gal.
Presentación
Na presentación do programa na Cidade da Cultura participaron representantes dos oito concellos que dende o ano 2011 veñen traballando de maneira conxunta: Boqueixón, A Estrada, Santiago de Compostela, Silleda, Teo, Touro, Vedra e Vila de Cruces. No acto interviron a alcaldesa de Santiago, Goretti Sanmartín; a alcaldesa de Teo, Lucía Calvo, así como o representante da Comisión do Entroido de Lestedo, José Manuel Iglesias, e o representante da Asociación Cultural Xenerais da Ulla de Santiago de Compostela, Jesús Cebeiro, que falaron en nome das múltiples agrupacións e entidades veciñais que manteñen viva esta festa propia e singular da comarca da Ulla.
Tamén estiveron presentes o alcalde de Boqueixón, Ovidio Rodeiro; o concelleiro de cultura de A Estrada, Juan Constenla; a alcaldesa de Silleda, Mónica González; o alcalde de Touro, Roberto Castro; o alcalde de Vedra, Carlos Martínez; e o alcalde de Vila de Cruces, Luis Celso Taboada. Ademais, asistiron directora de promoción da Axencia de Turismo de Galicia, Carmen Pita, a directora xeral de Patrimonio Cultural, María del Carmen Martínez, o secretario xeral de Política Lingüística, Valentín García, a directora xerente da Cidade da Cultura, Ana Isabel Vázquez, a deputada de Cultura da Deputación de A Coruña, Natividade González, e a deputada de Turismo da Deputación de Pontevedra, Ruth González.
Entroido dos Xenerais da Ulla
O Entroido dos Xenerais da Ulla remonta as súas orixes á primeira metade do século XIX e baséase nos enfrontamentos bélicos que se viviron na comarca nese período: a invasión do exército napoleónico, a revolución do 1846 ou as guerras carlistas. Os oito concellos nos que se celebra o Entroido conseguiron que no 2014 tivera lugar a primeira edición do Entroido xa como Festa de Interese Turístico de Galicia.
Os personaxes máis importantes son os xenerais e correos a cabalo, que percorren as parroquias dando vivas a veciños e visitantes, acompañados dun «exército» de abandeirados, coros, comparsas e parrandas. Rematan escenificando un atranque ou alto, enfrontamento dialéctico por parellas, aproveitado para facer burla e sátira de asuntos locais, de política ou do corazón.